Cefnogi Dysgwyr Anabl

Ein nod yw rhoi cyfle cyfartal i bob myfyriwr, gan gynnwys y rhai ag anableddau, i fanteisio ar ein hystod eang o brofiadau academaidd, cymdeithasol a diwylliannol.​ Rydym yn ceisio – gydag addasiadau rhesymol – diwallu anghenion a goresgyn anawsterau, fel nad yw’r rhain bellach yn rhwystr i ddarpar fyfyrwyr a myfyrwyr presennol. 

Rydym yn croesawu ceisiadau gan fyfyrwyr sydd ag anghenion ychwanegol. Ni fydd datganiad o anabledd yn eich rhoi o dan unrhyw anfantais yn y broses o wneud cais. Rydym yn annog myfyrwyr sydd ag anabledd datganedig i ymweld cyn gwneud cais er mwyn gweld y cyfleusterau sydd ar gael.

Mae Cynghorwyr Anabledd a Rheolwyr Cymorth Dysgu ar gael i drafod anghenion unigol, yn enwedig unrhyw drefniadau penodol sydd eu hangen ar gyfer mynediad, cymorth dysgu, cymorth astudio, darlithoedd, lleoliadau, asesiadau ac arholiadau.

Bydd nifer ohonoch eisoes wedi cael rhywfaint o gymorth gyda’ch astudiaethau, naill ai yn yr ysgol neu’r coleg, ac wedi gweld bod cymorth wedi’ch helpu i gael canlyniadau da. Mae llawer o fyfyrwyr yn y Drindod Dewi Sant hefyd yn elwa ar gael cymorth gyda’u hastudiaethau. Os ydych chi eisoes yn gwybod bod rheswm penodol pam y bydd angen cymorth arnoch, y peth gorau i’w wneud yw cysylltu â’r Cynghorydd Anabledd.​

Mae Diwrnodau Agored yn gyfle perffaith i ddod i weld ein campysau drosoch eich hun.  Ein nod yw creu amgylchedd cynhwysol a hygyrch i bawb.  Os oes gennych unrhyw anableddau ac yr hoffech roi gwybod am eich anghenion penodol cyn Diwrnod Agored rydym yn eich annog i wneud hynny wrth archebu.​ 

Mae eich llwyddiant a’ch lles yn bwysig i ni, ac rydym yma i’ch cynorthwyo er mwyn sicrhau fod eich ymweliad yn un addysgiadol a chroesawgar. Edrychwn ymlaen at gael cwrdd â chi a gwneud yn siŵr bod eich profiad o’r diwrnod agored yn un cadarnhaol a chynhwysol.

I’r rheini sy’n astudio o bell, mae modd i ni ddarparu nifer o wasanaethau i hwyluso eich profiad astudio.

Gall ein tîm cymorth arbenigol roi cymorth arbenigol un-i-un o bell i’r rheini sydd â hawl i gymorth a ariennir o dan y Lwfans Myfyrwyr Anabl trwy MS Teams.  

Rydym hefyd yn cynnig cymorth Sgiliau Astudio i bob myfyrwyr trwy Sgiliau Astudio o Bell ar MS Teams. Mae’r amserlen ar gael ar yr HWB Myfyrwyr.

Mae unrhyw fyfyrwyr sydd â gwahaniaethau dysgu penodol megis dyslecsia, dyspracsia, ADD ac Anhwylderau’r Sbectrwm Awtistig yn cael cynnig cymorth gyda cheisiadau am Lwfans Myfyrwyr Anabl, cymorth a chyngor priodol ac arweiniad ynglŷn ag addasiadau rhesymol.​ Bydd cymorth yn cael ei gynnig mewn sawl maes, fel:

• Sut i wella eich aseiniadau
• Adolygu’n effeithiol ar gyfer arholiadau
• Trefn bersonol a threfnu eich amser a’ch gwaith

Gwybodaeth am Ddyslecsia ac Anawsterau Dysgu Penodol eraill i ddarpar fyfyrwyr

Mae Prifysgol Cymru Y Drindod Dewi Sant yn croesawu ceisiadau gan fyfyrwyr sydd â dyslecsia ac Anawsterau Dysgu Penodol eraill. Gallwn wneud trefniadau ar gyfer:

• Rhoi gwybodaeth i ddarpar fyfyrwyr a myfyrwyr presennol
• Sgrinio cychwynnol
• Asesu
• Hawl i Lwfans Myfyrwyr Anabl
• Cefnogaeth diwtorial gynnar a phriodol
• Staff y Brifysgol yn eirioli drosoch
• Consesiynau lle bo angen

Os ydych eisoes wedi’ch asesu’n un sydd â dyslecsia neu os oes gennych Anhawster Dysgu Penodol arall, argymhellwn eich bod yn cysylltu â’r Gwasanaethau Myfyrwyr cyn gynted â phosibl. 

Ar hyn o bryd rydym yn dilyn canllawiau Adran Addysg y Llywodraeth. 

Mae PCYDDS yn awyddus i sefydlu perthynas waith effeithiol gyda chyflenwyr Cynorthwywyr Anfeddygol allanol (NMH) i sicrhau darpariaeth cymorth o safon er budd ein myfyrwyr.

Rhaid i ddarparwyr cymorth Cynorthwywyr Anfeddygol (NMH) gadw at safonau Fframwaith Sicrhau Ansawdd (QAF) y Grŵp Sicrhau Ansawdd Lwfans Myfyrwyr Anabl (DSA-QAG) a chanllawiau Adran Addysg y Llywodraeth, a sicrhau bod yr holl bolisïau perthnasol yn eu lle, a’u bod yn cael eu rhannu â’r myfyriwr, ac ar gael i’r Brifysgol ar gais.

Mae DSA-QAG yn ei gwneud yn ofynnol i ddarparwyr NMH allanol sefydlu mecanweithiau adrodd gyda Sefydliadau Addysg Uwch (SAUau) i roi gwybod iddynt am y cymorth sy’n cael ei roi i fyfyrwyr. Rhaid iddynt egluro i fyfyrwyr bwysigrwydd y mecanwaith adrodd, ac annog myfyrwyr i roi caniatâd i wybodaeth gael ei rhannu.  Rhaid iddynt hefyd ymgyfarwyddo â’r wybodaeth a ddarperir gan y SAU ynglŷn â darparu gwasanaethau NMH i’w myfyrwyr, a rhannu’r wybodaeth hon gyda’r gweithwyr cymorth.

Mae ein cynghorwyr anabledd ac iechyd meddwl wedi’u lleoli yng nghyfarwyddiaeth Gwasanaethau i Fyfyrwyr y Brifysgol. Mae’r cynghorwyr yn cydweithio â rhwydwaith o gysylltiadau anabledd yn ein cyfadrannau a’n cyfarwyddiaethau eraill i hwyluso amgylchedd dysgu hygyrch a chynhwysol i fyfyrwyr ag anableddau. Mae rhagor o wybodaeth ar gael am rolau a chyfrifoldebau ein darpariaeth cymorth anabledd ac iechyd meddwl. Mae manylion am wasanaethau cymorth eraill i fyfyrwyr yn y Brifysgol hefyd ar gael ar ein gwefan.

Mynediad i Weithwyr Cymorth

• Man cyfrinachol 1:1 y gellir ei drefnu ymlaen llaw

Mae darparwyr allanol yn gyfrifol am ddarparu cyfleusterau cyfarfod addas sy’n gyfforddus, yn gyfrinachol ac yn ystyried anghenion y myfyriwr. Gan mai prin yw’r ystafelloedd cyfarfod 1:1 y mae modd eu cadw ymlaen llaw yn y Brifysgol, fel arfer byddai disgwyl i ddarparwyr allanol wneud trefniadau annibynnol y tu allan i’r Brifysgol.

Ymweld a Pharcio

Ar adegau prin pan fo cymorth yn cael ei ddarparu ar y safle, rydym wedi rhoi gwybodaeth am barcio ger campysau’r Brifysgol a chyfarwyddiadau i gampysau’r Brifysgol.

Mae gan PCYDDS sawl campws, mae rhagor o wybodaeth am gampysau’r Brifysgol a’r cyrsiau a ddarperir ar y campysau hynny ar gael ar ein gwefan.

Mae canllawiau mynediad y Brifysgol hefyd yn ddefnyddiol yn y lle cyntaf ar gyfer gwybodaeth am fynediad o amgylch y campysau ac adeiladau hygyrch.

Iechyd a Diogelwch

Os bydd gweithwyr cymorth yn cyfarfod â myfyrwyr ar y safle, rhaid iddynt fynd i’r dderbynfa berthnasol ar gampws y Brifysgol i:

• fewngofnodi;
• cadarnhau eu rheswm dros ymweld a gyda phwy y maent yn ymweld â nhw;
• gofyn am fanylion ynglŷn â gweithdrefnau tân a gwacáu lleol.

Caiff ymwelwyr allanol eu gwahardd rhag mynd i fannau anawdurdodedig neu ardaloedd nad ydynt yn angenrheidiol neu’n berthnasol i ran o’u gwaith. Os bydd larwm tân yn canu, rhaid i weithwyr cymorth adael yr adeilad ar unwaith yn ôl y cyfarwyddyd.   Yn yr un modd, rhaid rhoi gwybod ar unwaith i staff y derbynfeydd am unrhyw ddamweiniau neu sefyllfaoedd brys.

Dylai darparwyr NMH allanol hefyd fod yn ymwybodol o ganllawiau’r Brifysgol ar ddiogelwch yn y gweithle/yn gyffredinol.

Cyfathrebu ac Adborth

Dylid anfon gwybodaeth am y gefnogaeth a ddarperir i fyfyrwyr anabl i anabledd@pcydds.ac.uk

Rhaid i ddarparwyr allanol:

• roi gwybod i’r Brifysgol os ydynt yn darparu cymorth i’n myfyrwyr;
• rhoi gwybod i’r Brifysgol gan roi enw’r person yn y sefydliad (gan gynnwys manylion cyswllt) y gallwn gysylltu â nhw am unrhyw ymholiadau ynglŷn â chymorth i fyfyrwyr, ac ymateb yn brydlon i ymholiadau neu bryderon a godir am drefniadau cymorth i fyfyrwyr
• darparu copïau o unrhyw bolisïau perthnasol ar gais
• sicrhau bod cyllid yn ei le cyn dechrau sesiynau gyda myfyriwr, monitro’r defnydd o’r oriau a neilltuwyd, a sicrhau nad yw myfyrwyr yn rhedeg allan o gyllid (nid yw PCYDDS yn atebol am unrhyw daliadau y mae Cyllid Myfyrwyr Lloegr neu Gyllid Myfyrwyr Cymru yn gwrthod eu talu)
• trefnu ystafelloedd cyfarfod addas ar gyfer sesiynau cymorth a fydd fel arfer oddi ar y safle oherwydd argaeledd cyfyngedig ystafelloedd addas ar y campws;
• cyfeirio myfyrwyr yn ôl at eu cynghorydd anabledd neu at y gyfadran berthnasol i drafod unrhyw faterion yn ymwneud â gwasanaethau’r Brifysgol neu eu cwrs
• cysylltu â’r cynghorwyr anabledd ac iechyd meddwl drwy anabledd@uwtsd.ac.uk ar unwaith os bydd unrhyw bryderon yn codi yn ymwneud ag ymgysylltu â chymorth, lles, diogelwch, neu ddatblygiad academaidd fel y gellir mynd i’r afael ag unrhyw bryderon mewn modd amserol
• darparu adroddiad cryno ar gyfer pob myfyriwr sy’n derbyn cymorth ar ddiwedd pob tymor (diwedd Rhagfyr, Mawrth, a Mehefin), gan gynnwys y wybodaeth ganlynol:
  • enw’r myfyriwr/myfyrwyr a rhif cofrestru’r cwmni (CRN);
  • enw’r gweithiwr/gweithwyr cymorth;
  • disgrifiad byr o’r cymorth a ddarparwyd;
  • dyddiad dechrau darparu’r cymorth;
  • nifer y sesiynau/oriau cymorth a ddarparwyd y tymor hwnnw, a chyfanswm y flwyddyn hyd yma;
  • lleoliad darparu’r cymorth;
  • nodyn am unrhyw faterion y mae angen i’r Brifysgol fod yn ymwybodol ohonynt neu fynd i’r afael â nhw. 

Rydym yn darparu amgylchedd dysgu cyfryngol sy’n dangos parch at fyfyrwyr a staff ac sy’n grymuso’r rhai sy’n ymwneud â’r broses ddysgu. Mae hyn yn adlewyrchu’r amgylchedd cyfreithiol, lle mae ymgynghori’n cael ei annog ac mae cynnwys y defnyddwyr yn cael ei ystyried yn hanfodol.

Ystyrir bod yr holl ddeunydd sy’n ymwneud ag anghenion ychwanegol yn gyfrinachol oni bai fod y myfyriwr yn llofnodi datganiad sy’n awdurdodi datgeliad, er enghraifft i ddarlithwyr, staff cymorth neu arholwyr.

Mae Contract Dysgu Unigol yn pennu lefelau disgwyliadau’r naill ochr a’r llall, ac yn cael ei drafod rhwng y myfyriwr a’i staff cymorth, ac yna ei lofnodi gan bob un sy’n cymryd rhan. Bydd yn cael ei adolygu ar adegau penodol yn ystod y flwyddyn.  This is reviewed at specific times during the year.

Canolfannau Mynediad - A fyddech cystal ag anfon ymholiadau ac Adroddiadau Asesu Anghenion ar e-bost - diolch.

Cyfraddau Cymorth Anfeddygol (NMH) - Prifysgol Cymru Y Drindod Dewi Sant

Cyfradd safonol NMH (wyneb yn wyneb)